Govva/Photo: Mihkku Solbakk
 
Mortena maŋimuš mearramátki – Čáhcerávggaid ja jáme

Oktii vulggiiga guokte vieljaža, Morten ja Ánde, čakčat guliiguin Čáhcesullui goappáge fatnasiin. Manadettiin lei sudnos hirbmat šiega dálki ja siivu borjat. Nuppi beaivvi soai máhcaiga ruoktot. Eahkedis beaivvi joavddaiga Gohpi ovdii. De gahčai hirbmat garra oustán, ja Morten gopmánii Ceavccageađgegeahčái; dasgo gielas válddii bodnái ja šattai fatnasa vuollai. Ánde borjjastii meattá, muhto go dálki lei nu garas, de fertii son orustit Ceavccageađgegohppái. Dasa son cohkuhii fatnasis ja vázzilii oarjjás. Son lei aiddo Gurraluovttas, de oaidná son olbmá fievrrás boahtimin bajás su vuostá. Ánde čuoččastii albmá vuordit, dasgo dovddai su – su viellja han lei. Ánde vurddii vielljasis. Go Morten bođii su lusa, de válddii su gitta ja geassigođii fiervái ja dadjá: "Go it viššan mu gádjut, de galggat dál mu mielde mannat mearrabodnái." De čurvii Ánde: "De boahttet dál veahkkin, buot dat guđet leat hávddi siste vuoiŋŋasteamen." Morten čuorvvui: "Buot mearraeallit, boahttet veahkkin!" De šattai hirbmat šuvva gáttis ja šávva mearas; jámežat bukte gistostuhkaid vearjun, ja rávggat bukte starraleakkaid. Jámežat sohte Ándde beales, ja rávggat sohte fas Mortena beales. Go iđitguovssu šaddagođii, vulge jámežat ja rávggat guđđe vearjjuideaset dása, dasgo jámežat bihte bealiset ja rávggat vuoittáhalle. Ánde beasai dáinna lágiin heggii. Dat báiki, gos jámežat ja rávggat dorro, gohčoduvvo ain dálge Gurraluoktan, dasgo jámežat ja rávggat leat čiekčan gobi dan báikái.

Nuppi beaivvi vulggii Ánde fatnasis viežžat ja bođii dan báikái. Doppe ledje gistofiellostuhkat ja starraleakkat, nu olu ahte ii lean oppa gállimisge. Ánde goarkŋui bajás ja ceggii dasa geađggi, muitun dasa ahte jámežat ledje ceavzán ealli olbmo bealde. Doaivumis lea dat geađgi mii dál gohčoduvvo Ceavccageađgin, man birra dát lea. Máinnasteaddji lea seaguhan "ceakkiš" sáni, mii mearkkaša "ceggejuvvon geađgi "ceavzit" sániin, mii mearkkaša ahte birge, ja mii sulastahttáge sáni "ceavcce". Dál gohčoduvvo dát báiki dárogillii Mortensnes, dasgo, nugo máinnasteaddji muitala, Morten sorbmašuvai njárgageahčai.

NorskEnglish 
Tilbake Tips en venn!