Máinnas Álda Áhku ja sulluid sirdima birra

Dán máidnasa lea muitalan Ole Aikio, Juvravuonas.

Várjjagis orui dološ áiggi noaideáhkku guhte gohčoduvvui Álda Áhkkun. Son anii fuola das ahte Várjjatvuonas galggai olbmuin leat buorre dilli. Rájá ruoššabealde diđii son muhtin sulluid mat gohčoduvvo Ainaisullot. Doppe ledje olu boskkat, njurjot, manit ja uvjjat.

Várjjatvuonas lei suolu mii gohčoduvvui Várjavuonsuolu – mii soaitá leat Suolu Unjárgga girkobáikki olgolis, muhto doppe ii lean lahkage nu olu šaddu go Ainaisulluin. Muhtin beaivvi mearridii áhkku sirdit Ainaisulluid Várjjatvutnii. Várjavuonsullo áiggui son sirdit dohko gos Ainaisullot ledje. Son goarkŋui várrái mii lei Juvravuona bajábealde. Beatnaga son guđii Davvenjárgii. Dás galggai dat čohkohallat ja čuovvut go sullot česse Ruoššas. Várrevielttis Álda Áhkku juoigagođii ja noidošisgođii. Ainaisullot spargigohte ja sirdašuvvagohte hiljážit. Lottit girdiledje ja šattai riedja ja eallin.

De lei nu ahte ruoššabealdege ásai noaidi, guhte morihii dán eallima geažil ja áddii mii lei geavvamin. Noaidi ii gal áigun diktit fárrehit dáid sulluid main lei nu vallji. Son de vuostálastigođii, ja čájehuvvui ahte ruoššanoaidi lei gievrrat go Álda Áhkku. Sulluid sirdima bissehettiin gottii noaidi Álda Áhku ja su beatnaga. Dat šattaiga geađgin. Juvravuona bajábealde váris sáhttit dálge oaidnit Álda Áhku. Son lea šaddan geađgin mii bávttis ihtá, iige leat váttis oaidnit ahte lea nissonhámat. Davvenjárggas lea okta geađgi mii sulastahttá beatnatoaivvi. Dat gohčoduvvo Benekoaivi, mii galgá leat Álda Áhku beatnaga bázahus.

NorskEnglish 
Tilbake Tips en venn!